Diario compartido de LifeSugar: panel e informe para médicos e enfermeiras

Como entrar

Catro pasos. O primeiro non o das ti.

1. 1

   O teu paciente dáche de alta desde a súa app

   Escríbeo en Axustes → Datos persoais → Correo do médico. O campo chámase así, pero vale para calquera profesional sanitario: se es enfermeira, o teu paciente escribe aí o teu correo. Se xa había un, o móbil pídelle pegada dixital, cara ou código para cambialo.

2. 2

   Ese correo ten que ser unha conta de Google

   Non fai falta que sexa un gmail. O do hospital ou o da consulta asóciase a Google sen cambiar de correo.

   Crear unha conta de Google co teu correo de sempre

   Google pide nome e data primeiro. No nome de usuario, escolle Usar o meu enderezo de correo electrónico actual.

3. 3

   Abre a ligazón e entra con ese correo exacto

   O permiso vai pegado ao enderezo que escribiu o teu paciente, letra por letra. Se tes varias contas abertas no navegador, escolle a correcta ou abre unha xanela de incógnito.

4. 4

   Escolle o paciente

   Se máis dun che deu acceso, saen todos na primeira pantalla. Só eses: dos demais non ves nin que existen.

Como se le o panel

Percorrémolo de arriba abaixo, con capturas do propio panel. Cada número da imaxe ten a súa explicación debaixo: que mide, de onde sae e cando se pon en ámbar ou en vermello.

1. 1.

   Os meus pacientes

   A quen miro primeiro?

   Fiestras fixas de 14 e 30 días

   Arriba vai a quen convén mirar antes. A lista usa sempre os mesmos días (14 para as glicemias, 30 para os días con rexistro) para poder comparar pacientes entre si; dentro de cada un manda o período que elixas. Só saen os pacientes que che deron acceso.

   123456

   1. 1

      Estado. É unha orde de revisión, non un diagnóstico, e mira os últimos 14 días. Avalíase nesta orde: Sen rexistros (non apuntou nada), Rexistra, non se mide (menos de 10 glicemias), Revisar (algunha baixa de madrugada, ou menos do 50 % de medicións en rango), Atención (algunha baixa, menos do 70 % en rango ou unha variabilidade por riba do 36 %) e Estable (ningunha das anteriores).

   2. 2

      Último rexistro. O último día no que apuntou algo e, debaixo, hai canto. É a data do propio rexistro, non a do día en que se sincronizou.

   3. 3

      Días con rexistro dos últimos 30. Conta días con algo apuntado, non rexistros: tres comidas nun día son un día. É o primeiro que di se o demais se sostén.

   4. 4

      En rango e glicemias, en 14 días. A porcentaxe de medicións entre o limiar de baixa e o límite alto do obxectivo do paciente, sempre xunto a cantas medicións hai detrás. Con menos de 10, sae un guión.

   5. 5

      Media e CV, en 14 días. A glicemia media en mg/dL e o coeficiente de variación: canto se separan as medicións desa media, en %. Por riba do 36 %, o panel trátao como variabilidade alta.

   6. 6

      Baixas en 14 días, coas de madrugada («noct.») debaixo. Unha baixa é unha medición por debaixo do limiar de hipoglicemia do paciente (70 mg/dL se non o cambiou) e a madrugada vai das 0:00 ás 5:59. Unha soa baixa de madrugada pon o paciente en Revisar, sempre que teña 10 glicemias ou máis eses 14 días.

2. 2.

   A ficha do paciente

   De quen falo e de que días?

   O período manda en todo o de embaixo

   Ábrese cos últimos 30 días. Cambia o período e cambia toda a pantalla, salvo dúas cifras con fiestra propia: a HbA1c estimada (sempre 90 días) e a dose diaria total de insulina (sempre 30).

   12345

   1. 1

      Volver e selector de paciente. Volves á lista ou saltas a outro paciente sen pasar por ela. Só saen os que che deron acceso.

   2. 2

      O período. Últimos 7, 14, 30 ou 90 días, este mes, o mes pasado, todo o histórico ou datas soltas. Ao carón, cantos días ten o rango elixido e cantos deles teñen rexistro.

   3. 3

      Tipo, tratamento e obxectivo glicémico. Pono o paciente no perfil da súa app. O obxectivo é o seu e define o que é baixa, en rango e alta en todos os gráficos. Se pon «por defecto», non o configurou e o panel usa 70–180 mg/dL.

   4. 4

      O resumo nunha frase. A porcentaxe de medicións en rango do período, con cantas hai detrás e cantas baixas e altas. Verde desde o 70 %, ámbar entre o 50 e o 70 %, e vermello por debaixo do 50 % ou con calquera baixa de madrugada (entón o titular di cantas houbo). Se a variabilidade pasa do 36 %, engádeo. Con menos de 10 medicións non dá porcentaxe. Describe; non pauta.

   5. 5

      Ver todo o perfil: idade, peso e IMC, ratio pautado, acción da rápida (o tempo que o paciente ten configurado) e se apunta os hidratos en gramos ou en racións. O que non estea no perfil sae como «Sen dato».

3. 3.

   Adherencia e calidade do dato

   Fíome deste dato?

   Comeza sempre por aquí

   Unha media de tres días non é unha media: cada cifra di cantos días hai detrás. Un día que falta non é un día a cero, é un día sen rexistro, e por iso os días baleiros tamén se pintan.

   123456789

   1. 1

      Días con rexistro sobre os do período (25 de 30 no exemplo). Un día conta se apuntou algo. Se non chega á metade, a cifra sae en ámbar.

   2. 2

      Comidas por día. A media de comidas nos días con rexistro, non en todos os días do período. Debaixo, cantas comidas hai en total.

   3. 3

      Días con algunha glicemia, con cantas medicións suman. Di se se mide con regularidade ou de vez en cando.

   4. 4

      Último rexistro dentro do período elixido. Se nese período non hai ningún, dío.

   5. 5

      O calendario: un cadrado por día, máis escuro canto máis rexistros ten (1–2, 3–4, 5 ou máis) e case branco se non apuntou nada. Un oco de varios días di cando deixou de apuntar: por aí comeza a conversa. O punto laranxa é un día con algunha glicemia, e o violeta, un día con deporte. Pasa por riba dun día para ver que apuntou.

   6. 6

      Perfil e totais. Se o perfil está sincronizado (se non, só hai diario) e cantos rexistros e días con rexistro ten en todo o histórico, non só neste período.

   7. 7

      Data declarada polo paciente. A porcentaxe de rexistros coa data e a hora que puxo el; o resto leva a da sincronización e pode estar desprazado. Por debaixo do 95 %, sae en vermello.

   8. 8

      Glicemias descartadas e respostas sen comida. As descartadas son valores fóra de 20–600 mg/dL, imposibles e case sempre un erro ao teclear: non entran en ningún cálculo. As respostas sen comida son glicemias posteriores que non se puideron asignar a unha comida (asígnanse á última das 6 horas anteriores). Se calquera das dúas pasa de cero, sae en vermello.

   9. 9

      Campos do perfil con dato. Cantos datos do perfil están cubertos (tipo de diabetes, tratamento, peso, ratio pautado, obxectivo…). Sen eles faltan cifras como as UI por quilo ou o desvío do ratio. Por debaixo de 4, sae en vermello.

4. 4.

   Glicemia

   Como vai a glicemia?

   Non é un sensor continuo

   Son picadas que o paciente apunta. Verás «medicións en rango», nunca «tempo en rango». E mídese máis cando sospeita que está mal: os extremos saen máis do que toca. Nos gráficos, o vermello é baixa, o verde en rango e o laranxa alta.

   12345678

   1. 1

      Medicións do período e en cantos días. Repártense nas de antes de comer, as de despois (respostas ao recordatorio) e as soltas, que non van ligadas a unha comida.

   2. 2

      Medicións en rango. A porcentaxe entre o limiar de baixa e o límite alto do obxectivo do paciente, con cantas son e a referencia do 70 %. Verde desde o 70 %, ámbar entre o 50 e o 70 %, vermello por debaixo. Con menos de 10 medicións non hai porcentaxe: di cantas hai.

   3. 3

      Baixas. Por debaixo do limiar de hipoglicemia do paciente (70 mg/dL por defecto), coas de madrugada (0:00–5:59) debaixo. Cunha soa, a cifra sae en vermello.

   4. 4

      Altas. Por riba do límite alto do seu obxectivo (180 mg/dL por defecto). Sae en ámbar se son máis do 30 % das medicións.

   5. 5

      Media e variabilidade. A media de todas as medicións, en mg/dL, e o CV: a desviación típica dividida entre a media, en %. Canto máis CV, máis se separan as medicións.

   6. 6

      HbA1c estimada (orientativa). É o GMI: 3,31 + 0,02392 × a glicemia media dos últimos 90 días, sexa cal for o período, e só sae con 30 medicións en 14 días distintos. A fórmula validouse con sensor continuo: con glicemias capilares é unha orientación e non substitúe a analítica.

   7. 7

      A franxa verde é o obxectivo deste paciente, cos seus dous límites escritos. Cada punto é unha medición, na hora á que se fixo; en vermello as baixas e en laranxa as altas.

   8. 8

      Busca onde se acumulan os puntos, non o punto solto. Unha nube alta a primeira hora e outra en rango pola tarde sinalan un momento do día, non un mal control xeral. Pasa por riba dun punto para ver a hora e se era antes ou despois de comer.

   123

   1. 1

      Antes ou despois de comer. Antes: a banda da glicemia coa que empezou a comida, que adoita vir da comida anterior ou da basal. Despois: a banda da medición posterior, só das comidas cuxo recordatorio contestou; se falta, fala do recordatorio, non do control.

   2. 2

      Unha columna por franxa do día, repartida en baixa (vermello), en rango (verde) e alta (laranxa), coa porcentaxe de cada tramo. A franxa sae da hora da comida: almorzo de 6:00 a 10:59, media mañá de 11:00 a 12:59, comida de 13:00 a 16:59, merenda de 17:00 a 19:59 e cea de 20:00 a 23:59.

   3. 3

      Cantas comidas hai detrás. Baixo cada columna vai a súa n e no pé, o total. Con menos de cinco, a n sae en vermello e esa columna non se interpreta.

5. 5.

   Comida e glicemia

   Como lle afecta o que come?

   Que había no prato

   O que un glicosímetro non ve. Os gramos saen dunha foto ou do que el elixiu na base: o segundo é máis fiable, e nos dous casos é unha estimación que serve para comparar días, non para cadrar gramos. Se apunta en racións, a app convérteas a gramos antes de chegar aquí. Máis abaixo hai unha táboa cos alimentos que máis se repiten e o que achega cada ración; os seus azucres son un mínimo coñecido, nunca un total.

   1234567

   1. 1

      Comidas medibles: só as que teñen glicemia antes e despois. Se o paciente non contestou ao recordatorio, esa comida non sae aquí, aínda que os seus hidratos si contan no día.

   2. 2

      Subida media: a media de «glicemia despois menos glicemia antes» nesas comidas, en mg/dL. Un +18 é que a medición posterior foi, de media, 18 mg/dL máis alta ca a previa. É o que pasou, con ou sen rápida: non illa o efecto da comida.

   3. 3

      Levaban rápida: que parte desas comidas teñen insulina rápida apuntada (27 de 29). Serve para saber se a nube mestura comidas con e sen insulina.

   4. 4

      Intervalo medio: os minutos que pasan, de media, entre a comida e a medición posterior. Non é fixo: a app programa o recordatorio segundo o tempo de acción da rápida e cada paciente contesta cando pode.

   5. 5

      Con ou sen rápida, ou por comida do día. Cambia o que separa a cor dos puntos: azul e laranxa segundo levasen insulina rápida ou non, ou unha cor por franxa do día.

   6. 6

      Un punto por comida: gramos en horizontal, canto cambiou a glicemia en vertical. Se a nube sobe cara á dereita, a cobertura queda curta nas comidas grandes. Se é plana e alta, o problema non é canto come. Se está moi dispersa, hai algo máis cós hidratos: o momento, o tipo de alimento ou o tempo entre a insulina e a comida. Pasa por riba dun punto para ver os minutos, a glicemia antes e despois, o alimento e a insulina.

   7. 7

      Por debaixo de cero, a glicemia baixou. O pé di cantas comidas teñen o par completo. O intervalo non é fixo: unha subida aos 45 minutos e outra ás 3 horas non se comparan.

   1234

   1. 1

      Hidratos por día. A media de hidratos rexistrados por día con rexistro e os gramos de media por comida. Debaixo, o obxectivo diario do paciente: se o supera en máis dun 15 %, a cifra sae en ámbar.

   2. 2

      Comidas con desglose: cantas traen os alimentos identificados, sexa por foto ou elixíndoos na base, sobre o total de comidas, e cantos alimentos suman.

   3. 3

      Día, semana ou mes. Cada gráfico leva o seu propio selector. En semana e mes, cada barra é a media por día.

   4. 4

      A liña verde descontinua é o obxectivo diario de hidratos, se o paciente o ten, e as barras laranxas son os días que o superan. Son hidratos rexistrados, non inxeridos: se apunta pouco, a barra baixa sen que comese menos.

6. 6.

   Insulina

   Que se pon?

   Un día sen barra non é un día sen insulina

   É o que apunta, e pode non ser todo. Mírao xunto á adherencia: se a basal desaparece, case sempre deixou de apuntala. Con bolígrafo, a basal vai á parte; con bomba non se rexistra nunca e pode saír baleira.

   123456

   1. 1

      Rápida por día. A media de unidades de rápida nos días con rexistro e a porcentaxe de comidas que a levan. Se non hai ningunha, pon «non rexistra rápida».

   2. 2

      Basal por día. A media de unidades de basal nos días con rexistro. Con bomba non se rexistra e o panel dío; se non usa bomba e sae baleira, é que non a apunta.

   3. 3

      Ratio aplicado fronte ao pautado. Gramos entre unidades nas comidas con rápida; as correccións non entran, porque non cobren hidrato. O desvío é aplicado menos pautado, e se se separa máis de 2 g/UI, sae en ámbar. É o que fixo, non o que debería facer.

   4. 4

      Dose diaria total. Rápida máis basal, de media por día con rexistro, e as UI por quilo se o perfil ten o peso. Mira sempre os últimos 30 días, sexa cal for o período.

   5. 5

      Rápida e basal, apiladas. Cada barra suma as dúas e a cifra de enriba é o total do día. Un día sen barra é un día sen rexistro, non un día sen insulina: compáraro co calendario.

   6. 6

      Día, semana ou mes, sen tocar o resto de gráficos. En semana e mes, cada barra é a media por día.

7. 7.

   Actividade física

   Móvese?

   O que apunta, non un reloxo

   Sae da sección Deporte de cada rexistro: tipo, minutos e intensidade. Aquí non se cruza coa glicemia. Para ver como estaba antes e despois dunha sesión, pasa por riba dese día no calendario ou búscao no historial. Un rexistro cunha duración imposible (0 minutos ou máis de 10 horas) non conta, e o panel avísao debaixo do gráfico.

   1234567

   1. 1

      Minutos por semana. Os minutos totais do período repartidos entre as semanas que dura, coa referencia de 150. Se o período ten menos de 7 días non se escala: ensina os minutos que hai.

   2. 2

      Días con deporte sobre os do período, e cantas sesións. Unha sesión é cada vez que apuntou deporte: camiñar e correr apuntados xuntos son unha soa.

   3. 3

      O que máis fai. A actividade á que dedicou máis minutos no período e a súa intensidade máis habitual (suave, moderada ou intensa), tamén contada por minutos.

   4. 4

      Calorías queimadas. Estímaas a app coa duración e a intensidade, ou escríbeas o paciente. Serven para comparar semanas, non como medida.

   5. 5

      Día, semana ou mes. Cada gráfico leva o seu propio selector, e este ábrese por semana.

   6. 6

      A liña de 150 minutos é a recomendación semanal da ADA e da OMS para adultos, a intensidade moderada: unha referencia, non un obxectivo pactado con este paciente.

   7. 7

      As barras raiadas son semanas ou meses cortados polo período: só teñen parte dos seus días dentro. Escálanse a minutos por cada 7 días para poder compararas coa liña.

8. 8.

   Historial

   Podo repasalo co paciente diante?

   CSV e PDF levan todo o cargado

   Que comeu, como chegaba, que se puxo e como acabou, fila a fila. A data e a hora son as que declarou o paciente, na súa zona horaria. Se o período pasa de 500 rexistros, o panel avisa antes de exportar: acota as datas.

   1234567

   1. 1

      Todo o día, mañá, tarde ou noite. Mañá vai de 6:00 a 13:59, tarde de 14:00 a 20:59 e noite de 21:00 a 5:59. «Ver máis» só amplía o que ves en pantalla.

   2. 2

      CSV e Imprimir / PDF levan todos os rexistros do período, ata os 500 máis recentes, non só as filas da pantalla. O CSV ábrese en Excel e o PDF é o informe enteiro.

   3. 3

      Tipo e detalle. Comida, corrección, glicemia, glicemia posterior, basal ou deporte e, debaixo, a franxa e o que había no prato (por foto ou elixido na base). Unha «glicemia posterior» é a resposta ao recordatorio: aparece soa e, emparellada, na comida á que pertence.

   4. 4

      HC, azucres e kcal desa comida: unha estimación a partir da foto ou da base de alimentos, en gramos e quilocalorías. Os azucres só saen se o alimento os trae.

   5. 5

      Rápida, ratio e Pre. As unidades de rápida desa comida; o ratio, gramos entre unidades, o observado e non o pautado (as correccións non o teñen); e Pre, a glicemia coa que chegou. Nunha medición solta, Pre é ela mesma.

   6. 6

      Post, Δ e Interv. Post é a glicemia posterior emparellada; Δ é Post menos Pre; e Interv., os minutos reais entre as dúas, non un valor fixo ás dúas horas. En laranxa, as altas; en vermello, as baixas.

   7. 7

      Un oco en Post di por que: sen contestar (o recordatorio xa tocaba e non houbo resposta), pendente (aínda non toca) ou sen medir (esa comida non ten recordatorio).

É apoio á consulta, non unha guía de tratamento: o panel non propón pautas nin cambios de tratamento, non calcula doses e non xulga ningunha cifra. A interpretación e a decisión son túas.

Preguntas frecuentes sobre o panel para médicos e enfermeiras